O Concello de Barreiros vén de trasladarlle a Adeac, o organismo que outorga as Bandeiras Azuis, a decisión de non proceder ao izado de ningunha das tres bandeiras azuis outorgadas ás praias de Acantilado-Remior, Coto e A Pasada; ante a imposibilidade de contar con persoal de socorrismo suficiente para garantir os mínimos considerados para o mantemento do emblema.
Na súa comunicación a Adeac, a rexedora destaca que o emblema outorgado recoñece a calidade das praias e dos servizos existentes nas mesmas durante a tempada estival. “Pese a ter tratado de cumprir con todas as esixencias e realizar un importante esforzo para poder manter os servizos que deron lugar ao seu outorgamento, entendemos que a opción máis responsable de cara a non prexudicar o recoñecemento presente e futuro do noso municipio a nivel medioambiental e turístico é renunciar ao izado das mesmas nesta tempada, sen impedimento e coa esperanza de poder izalas en vindeiras tempadas”, explicou.
En todo caso, Barreiros ten a intención de manter todos os servizos posibles neses areais dando cumprimento aos criterios Bandeira Azul, xa que “repercuten na boa imaxe dos areais e no benestar das persoas usuarias dos mesmos”.
SEN SOCORRISTA
A alcaldesa explicou que pese a abrir unha bolsa de socorrismo na primavera e mantela aberta aínda neste momento, só hai cinco persoas coa titulación suficiente para traballar no servizo nas praias de Galicia, o que imposibilita cumprir os criterios marcados en todo momento, “xa que hai que ter en conta as libranzas do persoal ou posibles imprevistos”.
No que respecta ao persoal de prevención, o Concello apostou pola contratación doutro tipo de persoal, como vixiantes, técnicas sanitarias ou patróns de embarcacións para tentar garantir a seguridade, “pero esas persoas non poden considerarse socorristas e polo tanto, “resulta imposible garantir en todo momento a cantidade necesaria de socorristas pedido por Bandeira Azul.”
Ana Ermida insiste na necesidade de afrontar esta problemática dun xeito global e na que a Xunta debe poñer os medios para solucionar unha situación que “cada ano é maior e que só se dá en Galicia, por unha serie de decisións en canto a titulación e ás condicións de temporalidade que impiden a profesionalización do socorrismo, condenado a unha tempada de verán cada vez máis curta.”
PPdeG
Pola súa banda, o PP atribúe a falta de socorristas en Barreiros á “falta de previsión e á desastrosa xestión de Ana Ermida”. Nun comunicado, a formación popular advirte que, dende que os nacionalistas chegaron ao Concello, o número de profesionais que se contrataban para esta fin sempre foi a menos.
O su voceiro, Gómez Puente considera que os argumentos dados pola rexedora “son escusas” e evidencian “falta de vontade política e de traballo por parte da alcaldesa”, xa que outros concellos limítrofes como os de Ribadeo ou Foz non contan con baixas neste servizo. “O único que conta son contos, e dos contos non se vive. Barreiros ten nas súas praias un forte potencial turístico e económico. É unha mágoa que a alcaldesa non aposte por elas”, indica o voceiro do PP.